பூவரசு கலை இலக்கியப் பேரவையின்
பூவரசம் பொழுது 98
பூவரசு இனிய தமிழ் ஏட்டின் 7வது ஆண்டு நிறைவுவிழா பூவரசம் பொழுதாக 24.01.1998 சனிக்கிழமையன்று ஜெர்மனி- பிறேமன் நகரில் சிறப்புற மலர்ந்தது.
திருமதி கோசல்யா சொர்ணலிங்கம், திருமதி வில்ரூட் கடெல்கா ஆகியோர் மங்கள விளக்கேற்றி நிகழ்ச்சிகளை ஆரம்பித்து வைத்தனர்.
அமைதி வணக்கத்தைத் தொடர்ந்து திருமதி வசந்தாதேவி புவனேந்திரன் இறைவணக்கப் பாடலைப் பாடினார். செல்வி பிரதீபா மகேஸ்வரன் வரவேற்புரை வழங்கினார். பேரவைக் கீதமும் அதனைத் தொடர்ந்து மழலையர் நடனமும் இடம்பெற்றன.
ஜேர்மனியின் பல பாகங்களிலுமிருந்துவந்த முன்னணி எழுத்தாளர்கள், கவிஞர்களோடு பிறேமன்வாழ் கலைஞர்கள் இணைந்து நிகழ்ச்சிகளை வழங்கினார்கள்.
பூவரசு 7வது ஆண்டு நிறைவையொட்டி நடாத்திய சிறுகதை கவிதை கட்டுரைப்போட்டிகளில் சிறுகதைக்கான முதற்பரிசைப் பெற்றுக் கொண்டவரும் முன்னணி எழுத்தாளரும் விமர்சகருமான
திரு பொன்னையா கருணாகரமூர்த்தி (பேர்லின்) இவ்விழாவின் சிறப்பு விருந்தினராகக் கலந்துகொண்டார்.
பூவரசு கலை இலக்கியப் பேரவையின் பிரதம ஆலோசகரான ஜெர்மானிய அம்மையார் திருமதி வில்ரூட் கடெல்கா கௌரவவிருந்தினராகக் கலந்து கொண்டு பூவரசின் கலை இலக்கிய சேவைகளைப் பாராட்டினார். வளரும் இளைய தலைமுறையினர் மத்தியில் தாய்மொழி கலை கலாச்சாரம் இவைகளை வளர்த்தெடுப்பதில் பூவரசு கொண்டுள்ள அக்கறை மெச்சத்தக்கதாய் இருப்பதாக அவர் குறிப்பிட்டார்.
செல்வன் ஆனந்த் குலதாசன், செல்வன் கஜிநாத் தவம், செல்வன் சிவஞ்ஜீவ் சிவராம் ஆகியோர் எங்கள் இளந்தளிர்கள் சார்பில் கலந்துகொண்ட இளம் சிறப்புரையாளர்கள்.
செல்வி ஆன் வினோலினி நடேசன் அவர்களின் நடனம் அடுத்து இடம்பெற்றது.
தொடர்ந்து நடன ஆசிரியை செல்வி ஸ்ரீரஞ்சனி குணரத்தினம் அவர்களின் மாணவ மாணவிகளின் பரதநாட்டியம் இடம்பெற்றது.
அடுத்து கவிஞை திருமதி கோசல்யா சொர்ணலிங்கம் அவர்களின் தலைமையில் „மானல்ல தேனல்ல மலரல்ல பெண்!“ என்னும் தலைப்பில் மகளிர் கவியரங்கு இடம்பெற்றது. பூவரசு கலை இலக்கியப் பேரவையின் உறுப்பினர் திருமதி சசிகலா தேவராஜாவின் வரவேற்புக் கவியைத்தொடர்ந்து கவியரங்கு ஆரம்பமாயிற்று.
திருமதி விஜயா அமலேந்திரன், திருமதி கன்னிகா சந்திரபாலன், திருமதி மகேஸ்வரி வரதராஜா, திருமதி ஜெகதீஸ்வரி சிவகுமார் ஆகியோர் பங்குகொண்டனர். பெண்விடுதலை, பெண்ணடிமைத்தனம் ஆணாதிக்கம், பெண்சுதந்திரம் என்பனவற்றை மையக்கருவாகக் கொண்டு கவிமலர்கள் தொடுக்கப் பட்டன.
புதுமையான முறையில் அரங்கேறிய „வீட்டுக்குப் போகவிடு!“ என்னும் இளந்தளிர்கள் பங்குகொண்ட இசை நாடகம் அனைவரையும் கவர்ந்தது.
தங்கக்கூண்டில் சிறைவைக்கப்பட்ட கிளி ஒன்று விடுதலக்காய் ஏங்குவதைச் சித்தரித்தது இந்த நாடகம். இந்துமகேஷ் அவர்கள் எழுதி இசைவடிவம்கொடுத்த இந்த நாடகத்தை பூவரசு கலை இலக்கியப்பேரவை உறுப்பினர் திருமதி சாந்தராணி பத்மகுமார் நெறிப்படுத்தியிருந்தார்.
ஒப்பனையாளர்களான செல்வன் அருண், செல்வி ஜெயராணி செல்லத்துரை ஆகியோர் இந்நாடகத்தின் வெற்றிக்குப் பக்கபலமாயிருந்தனர்.
அடுத்து இடம்பெற்ற செல்வி லக்சி கருணைராஜனின் „கிழக்கும் மேற்கும்“ கவிதை இசை நாடகம் மேலைத்தேச கீழைத்தேசக் கலாச்சாரத்தோடு பெண் விடுதலையையும் சித்தரித்தது.
இந்துமகேஷின் கவிதைவரிகளுக்கு அவரே குரல் கொடுத்திருந்தார். பங்குகொண்ட இளங்கலைஞர்கள் அனைவரும் தத்தம் நடிப்புத்திறனால் நாடகத்தை மெருகுபடுத்தியிருந்தார்கள்.
விழாவின் இறுதிநிகழ்ச்சியாக எழுத்தாளர் இராஜன் முருகவேல் அவர்களின் „அந்தமாதிரி“ நகைச்சுவை நாடகம் இடம்பெற்றது.
நகைச்சுவை என்ற பெயரில் எவர் மனதையும் புண்படுத்தாமல் எளிமையான வசனங்களில் நகைச்சுவை இழையோட எழுதப்பட்டிருந்த இந்நாடகம் வெளிநாடுகளில் வாழும் நம்மவர்களின் அறியாத்தனங்களாலும் அனாவசியச் செயற்பாடுகளினாலும் ஏற்படக் கூடிய பாதிப்பக்களைத் தொட்டுக்காட்டியது. புதிய நாடகக் கலைஞர்கள் பலர் முன்னணிக் கலைஞர்களோடு இணைந்து இந்நாடகத்தில் பங்கேற்றனர்.
திருவாளர்கள் மனோஹிமன், உதயகுமார், ரமேஷ், ஞானச்செல்வம், லட்சுமிகாந்தன், குலதாசன் ஸ்ரனிஸ்லோஸ் ஆகியோருடன் இந்நாடகத்தின் இயக்குனரான திருமதி பெனடிக்ரா ஞானச்செல்வமும் இணைந்து நடித்திருந்தார்.
பூவரசு 7வது ஆண்டு நிறைவுப் போட்டிகளில் பரிசுபெற்றவர்களுக்கும், பூவரசு இளையோர்க்கென வெளியிடும் எங்கள் இளந்தளிர்கள் நடாத்திய ஆண்டுப் போட்டிகளில் வெற்றயீட்டியவர்களுக்குமான பரிசுகளும் விழாவில் வழங்கப்பட்டன.
„புதியதல்ல புதுமையுமல்ல“ நூலுக்காகக் தமிழகத்தில் பரிசுபெற்ற கவிஞர் எழிலன் அவர்களைப் பாராட்டி பூவரசு கலை இலக்கியப் பேரவை பூவரசம்பொழுது 98இல் சிறப்பித்து விருது வழங்கியது.
பூவரசு கடந்த காலங்களில் நடாத்திய கலை வடிவங்களிலிருந்து தொகுக்கப்பட்ட பூவரசம்பூ வீடியோமலர் விழாவில் வெளியிடப்பட்டது.
இதன் முதற்பிரதியை பூவரசின் வாசகர் திரு கந்தையா சிவபாலன் அவர்களிடம் திருமதி புவனேந்திரன் வழங்கினார். பூவரசு 7வது ஆண்டு நிறைவு மலரின் முதற்பிரதியை பூவரசு வாசகர் திரு சுப்பிரமணியம் தயாபரன் அவர்களிடம் திருமதி இந்துமகேஷ் வழங்கினார்.
அறிவிப்பாளர்களாக செல்வன் பிரசன்னா, திரு விஜயகுமார் ஆகியோர் நிகழ்ச்சிகளைத் தொகுத்து வழங்கினர்.
பூவரசு ஆசிரியர் இந்துமகேஷ் அவர்களின் நன்றியுரையுடன் விழா இனிதாய் நிறைவு பெற்றது.
-இரசிகன்
நிகழ்வின் நிழல்கள்:
படப்பிடிப்பு
புகைப்படக் கலைஞர் திரு. எஸ்.தேவராஜா
